ຄະນະກໍາມະການ GIS

By admin on October 22, 2015

ຄະນະປະສານງານຂໍ້ມູນຂ່າວສານພູມສາດແຫ່ງຊາດລາວ
ຫນ້າ ທີ່ຕົ້ນຕໍຂອງ ຄະນະປະສານງານຂໍ້ມູນຂ່າວສານພູມສາດແຫ່ງຊາດລາວ ແມ່ນເພີ່ມທະວີການຮ່ວມມືລະຫວ່າງອົງການຕ່າງໆພາຍໃນສປປ ລາວ ທີ່ນຳໃຊ້ຂໍ້ມູນຂ່າວສານພູມສາດເພື່ອຫລີກລ່ຽງການເຮັດວຽກຊ້ຳກັນ. ຄະນະປະສານງານດັ່ງກ່າວໄດ້ມີການພົບປະເພື່ອປຶກສາຫາລືພຽງແຕ່ ຄັ້ງດຽວພາຍຫລັງທີ່ໄດ້ຖືກສ້າງຕັ້ງຂຶ້ນໃນປີ 2003. ຍ້ອນຄວາມຊ່ວຍເຫລືອຂອງລັດຖະບານແຟງລັງ (ໂຄງການເສີມສ້າງຄວາມເຂັ້ມແຂງໃນການບໍລິການຂໍ້ມູນແຜນທີ່ຢູ່ ສປປ ລາວ) ຄະນະດັ່ງກ່າວໄດ້ມີການເຄື່ອນໄຫວເພື່ອຮ່ວມມືກັນອີກ ເທື່ອໃຫມ່.

ກອງປະຊຸມຄັ້ງປະຖົມມະເລີກຫລັງຈາກກອງປະຊຸມເມື່ອປີ 2003 ໄດ້ຈັດຂື້ນໃນເດືອນທັນວາປີ 2011. ຄະນະປະສານງານຂໍ້ມູນຂ່າວສານພູມສາດແຫ່ງຊາດ ປະກອບມີບັນດາທ່ານສະມາຊິກຈາກກະຊວງອ້ອມຂ້າງເຊັ່ນ: ກະຊວງ ກະສິກຳ-ປ່າໄມ້, ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງ ອຸດສາຫະກຳ ການຄ້າ, ກະຊວງ ສາທາລະນະສຸກ, ກະຊວງສຶກສາທິການ ແລະ ກິລາ, ກະຊວງ ໂຍທາ ທິການ ແລະ ຂົນສົ່ງ, ກະຊວງ ແຜນການ ແລະ ການລົງທຶນ.

ຫນຶ່ງໃນບັນດາຫນ້າວຽກທີ່ສຳຄັນຂອງຄະນະດັ່ງກ່າວແມ່ນການຮ່ວມມືປະສານງານເພື່ອສ້າງ ພື້ນຖານໂຄງ ຮ່າງຂໍ້ມູນຂ່າວສານພູມສາດແຫ່ງຊາດ (NSDI). ພື້ນຖານໂຄງຮ່າງຂໍ້ມູນຂ່າວສານພູມສາດແຫ່ງຊາດ ກວມເອົາການສ້າງນະໂຍບາຍເພື່ອເອື້ອອຳນວຍໃນການເປີດກ້ວາງການນຳໃຊ້ ຂໍ້ມູນ, ການເລືອກໃຊ້ເທັກໂນໂລຢີທີ່ເຫມາະສົມໃນການແລກປ່ຽນຂໍ້ມູນ ແລະ ສ້າງມາດຕະຖານຂໍ້ມູນແຫ່ງຊາດ.

ອີກຫນຶ່ງຫນ້າວຽກທີ່ສຳຄັນ ຂອງຄະນະປະສານງານຂໍ້ມູນຂ່າວສານພູມສາດແຫ່ງຊາດ ແມ່ນເປັນຈຸດໃຈກາງໃນການໃຫ້ຂໍ້ມູນ, ລາຍລະອຽດ, ປະສານງານໃນຂົງເຂດວຽກງານທີ່ກ່ຽວຂ້ອງ ແລະ ມີການນຳໃຊ້ລະບົບຂໍ້ມູນຂ່າວສານພູມສາດ GIS.
ໃນເວັບໄຊທ ຂອງກົມແຜນທີ່ແຫ່ງຊາດໄດ້ເປີດໂອກາດໃຫ້ສະມາຊິກຜູ້ນຳໃຊ້ຂໍ້ມູນ ຂ່າວສານພູມສາດ ແລະ ບຸກຄົນທົ່ວໄປ ໄດ້ມີພື້ນທີ່ໃນການສົນທະນາ ແລະ ແລກປ່ຽນຄຳຄິດຄຳເຫັນກ່ຽວກັບວຽກງານທີ່ໄດ້ກ່າວມາ ຂ້າງເທິງນັ້ນ.
ນອກ ນັ້ນ, ຄະນະປະສານງານຂໍ້ມູນຂ່າວສານພູມສາດແຫ່ງຊາດລາວຍັງແນໃສ່ເພິ່ມທະວີ ຄວາມຮັບຮູ້, ເຂົ້າໃຈໃນການນຳໃຊ້ຂໍ້ມູນຂ່າວສານພູມສາດແຫ່ງຊາດເຊິ່ງເປັນຂໍ້ ມູນພື້ນຖານ ແລະ ເປັນຊັບສົມບັດທີ່ສຳຄັນ ຂອງຊາດ.